सरकारी काम आणि महिनाभर थांब….श्रीगोंद्यात उपजिल्हा रुग्णालयाच्या जागेची नोंद होईना

संजय आ. काटे

श्रीगोंदा, ता. २३ : उपजिल्हा रुग्णालयाला मंजूरी मिळून आता तब्बल अकरा वर्षे झाली. विशेष म्हणजे सरकार मेहरबान झाले आणि दोनदा मंजूरी दिली. महिन्यापुर्वी रुग्णालयासाठी जागा खरेदी झाली. पण महिन्यानंतरही सदर जागेची नोंद रुग्णालयाच्या नावाने लागलीच नाही.
सध्याच्या ३० खाटांचे ग्रामीण रुग्णालय, श्रीगोंद्याचे श्रेणीवर्धन करुन ५० खाटांचे उपजिल्हा रुग्णालयाची दोनदा प्रशासकीय मान्यता मिळाली. आजतागायत सदरील उपजिल्हा रुग्णालयाचे घोंगडे भिजत पडले आहे.
आमदार बबनराव पाचपुते व माजी आमदार राहुल जगताप यांनी प्रयत्न केले पण जागेअभावी बांधकामास प्रशासकीय मान्यता मिळूनही उपयोग होत नव्हता. आता गेल्या महिन्यात उपजिल्हा रुग्णालयासाठी जागा निश्चित होवून सदर जागेची खरेदी झाली. जागेचे खरेदीखत झाल्यावर २१ दिवसात ऑनलाईन नोंद लागते पण येथे सगळे सरकारी असतानाही महिना झाला तरी अशी नोंद लागलेली नाही. परिणामी जागेची नोंदच नसल्याने उपजिल्हा रुग्णालय इमारतीचे बांधकाम सुरु होत नाही हे वास्तव आहे.
श्रीगोंदा तालुक्यात एकूण ७ प्राथमिक आरोग्य केंद्र व ३९ उपकेंद्र आहेत. सध्या तालुक्यात एकमेव ३० खाटांचे ग्रामीण रुग्णालय आहे. तालुक्याचे क्षेत्रफळ, दोन राष्ट्रीय महामार्ग, ४ साखर कारखाने व लोकसंख्येचा विचार करता तालुक्यात अजून एक ग्रामीण रुग्णालय व १०० खाटांचे उपजिल्हा रुग्णालय गरजेचे आहे. आजही अत्यवस्थ/गरोदर रुग्णाला संदर्भित करावयाचे असल्यास ६० किलोमीटर च्या आत एकही शासकीय संदर्भ रुग्णालय उपलब्ध नाही. शेजारील तालुके ( दौंड , कर्जत , जामखेड) , भौगोलिक व लोकसंख्येबाबत लहान असूनही, १०० बेडची उपजिल्हा रुग्णालये चालू आहेत.