पोलिसांना आली ८२ दिवसांनी जाग…..
बीड जिल्ह्यातील परळी येथे मतदानाच्या दिवशी शदर पवार गटाच्या उमेदवाराच्या बॉडीगार्डला रोखले गेले होते. आता याप्रकरणी टक्क ८२ दिवसांनी पोलिसांना जाग आल्याने आरोपी कैलास फड याच्यासह सात जणांवर गुन्हा दाखल झाला आहे. परळी विधानसभा निवडणूकीत मतदानादिवशी उमेदवाराच्या बॉडीगार्डला रोखल्याच्या व्हिडीओ व्हायरल झाला होता.
राज्यातील विधानसभा निवडणुकांच्यावेळी परळी शहरातील मतदान केंद्रावर मोठा गोंधळ झाला होता. याप्रकरणी मंत्री धनंजय मुंडे यांचा समर्थक असणारा कैलास फड आणि त्याचा मुलगा निखील याच्यासह एकूण सात लोकांच्या विरोधात पोलिसांनी गुन्हा दाखल केला आहे. तब्बल ८२ दिवसांनी पोलिसांना या प्रकरणीजाग आली असून त्यांनी कारवाई करत गुन्हा दाखल केला आहे. उमेदवार राजेसाहेब देशमुख यांच्या बॉडीगार्डच्या जबाबावरून हा गुन्हा दाखल झाला.
विधानसभा निवडणुकीत मतदानादिवशी परळी शहरातील मतदान केंद्रावर गोंधळ झाला. यावेळी राष्ट्रवादी काँग्रेस शरद पवार गटाचे उमेदवार राजेसाहेब देशमुख यांच्यासाठी बीड पोलिसांनी मोहन दांडगे यांची बॉडीगार्ड म्हणून नेमणूक केली होती, त्यांना मुंडे समर्थकांनी दादागिरी करुन मतदान केंद्रात जाण्यापासून रोखले होते. एवढेच नव्हे तर ‘कोण पोलिस, कशाचा बॉडीगार्ड’ असे म्हणत ‘मध्ये कोणीही जायचे नाही’ असे धमकाववित त्या बॉडीगार्डला बाहेर काढले होते. हे सगळे घडत असतानाच देशमुख यांचे कार्यकर्ते ॲड. माधव जाधव यांनाही मारहाण झाली होती. या सगळ्याचा व्हिडीओ सोशल मीडियावर व्हायरल झाल्यानंतर अखेर अडीच महिन्यांनी बीड पोलिसांनी या प्रकरणाची दखल घेतली. या प्रकरणात कैलास फड, त्याचा मुलगा आणि इतर पाच जणांवर परळी शहर पोलिस ठाण्यात गुन्हा दाखल झाला आहे. २० नोव्हेंबर २०२४ रोजी सकाळी ११ च्या सुमारास हा प्रकार घडल्याचे बॉडीगार्डने जबाबात नमूद केले आहे.
परळी मतदारसंघात अनेक केंद्रांवरील वादग्रस्त व्हिडीओ सोशल मीडियावर व्हायरल झाले होते, तसेच शरद पवार गटाचे उमेदवार राजेसाहेब देशमुख यांना शिवीगाळ केली. त्यांचे सहकारी ॲड.जाधव यांना मारहाण झाली होती. याचे सर्व व्हिडीओ व्हायरल झाल्यानंतरही पोलिसांनी काहीच कारवाई केली नव्हती. आता याच प्रकरणात देशमुख यांच्या अंगरक्षकाचा अडीच महिन्यांनंतर जबाब घेण्यात आला आहे. त्यावरून कैलास फड, त्याचा मुलगा आणि इतर चार ते पाच जणांविरोधात परळी शहर पोलिस ठाण्यात गुन्हा नोंद झाला आहे.
राजेसाहेब देशमुख मतदान केंद्रावर जात असताना मी बॉडीगार्ड म्हणून त्यांच्या मागे जात होतो , तेव्हा कैलास फड तिथे होता. त्याने मला मतदान केंद्रावर जाण्यापासून रोखलं . मी पोलिस आहे, देशमुख यांचा बॉडीगार्ड असल्याचं त्यांना सांगितलं, तरीही कैलास फडने मला रोखलं. कोण पोलिस, कशाचा बॉडीगार्ड असे म्हणत मला अडवले. तसचे कैलास फडच्या मुलाने, निखिलनेही कोणीच मध्ये जायचं नाही सांगत रोखलं, हाताने थांबण्याचा इशारा दिला, असा जबाब बॉडीगार्डने दिला होता.